[Bl. 5r]

Von der München ursprung

[Im Bild:]

Jo. 8. Vos ex patre diabolo estis: et desideria patris vestri perficietis.

[Im Bild:]

Non vocabitur in eternu[m] seme[n] pessimoru[m]. Esa. 8.

[Spalte 1]

ALle menschen kommend hie hereyn

Hört wo die Münch her kommen sein

Wo her sy iren ursprung han

Will ich euch hie zuwissen thun

Lucifer füret alle seine tag

Eyn grosse jemerliche klag

Beklagt sich im leyb so ser

Besorgt wie daß er schwanger wer

Ein grausam gestalt bey im entpfandt

Der gleych auff erd nye ward erkandt

Nach grossem ratschlag hyn und her

Wuchs im der bauch und leib so ser

Daß er daran wolt zerprochen sein

Yedoch zuletst strackt er die bein

Riß mit gewalt den hyndern auff

Do fiel herauß ein solcher hauff

Von mancher gestalt, seltzam manir,

Dort zwölff da sechß / dort drey / da vier

Hetten allsament kutten an

Etlich weyb die andern man

Es was das seltzsamst wunder thier

Daß im warlich drab grauset schier

Es ist gantz glatzet hyndern orn

Uber den kopff herab geschorn

Was es erdenckt das darff es thun

Solt es sich drumb verbrennen lan

Im ist auff erden nichts zuvil

In aller sach brauchts widerspill

Als er den butzen anblickt

Sein krafft für diser gestalt erschrickt

Do er sach kotten mancherlay

Hub an ein sölch grausam geschray

Mit grosser forcht verwundert sich

Awe was hab gemacht ich

Ein wunderthier mit geschwindem list

Das aller Teuffel maister ist

[Spalte 2]

In allem betrug seltzam finantz

Lugend sy all nur irer schantz

Liegen daß sich die balcken biegen

Damits den gmeynen man betriegen

Auff das ir kasten keller füllen

Nach leybs lust brauchen iren willen

Die paurn müssen hacken tresschen

Den München ir gurgel wesschen

Und so ein gestorbner münchßtag kumpt

Handts drey tag davor auffgetrumpt

Ir sackpfeyff auff das best gestimpt

Wie es sich dan[n] zum geltsack zimpt

Alles nur auß eym stinckenden pracht

Dem gmeynen volck ein gplerr gemacht

So man das Kyrie eleison sing

Daß yeder dar ein pfenning bring

Am wercktag salstu acht drauff han

So nit vil leut in kirchen gan

Mit einem liechtlein kommens gerent

Recht wie ein Katz das maul verbrent

Ja zinden nit ein kertzen an

Und muß der Priester finster stan

Der list ein tütel für ein d[enarius]

Damit nit grosser kost auffgee

Und sammlen doch in aller welt

Vil liechter da man meß bey helt

Yedoch sicht man keins zünden an

Die alt weyb sy gewenet han

Die lassen nit ir alte art

Die sy all generret haben hart

Die kommen mit den liechtlein trabt

Die handts drey tag im seckel gehabt

Bringens dem armen bruder dar

Ja kempstu mit eym kolben har

Daß man in den fischhamen klopffet

Den bschorn zaun voln herausser zopffet

[Spalte 3]

Und leret sy halten götlich zier

Daß in Complet zum arß auß fier

Darnach den tag so trabens umb

Kein eck kein gaß was nie so krum[m]

Die sy nit all durch strichen han

Bey yeder magt und frau sy stan

Keyn schlamp mag nergen nit zergeen

Dar zu kumpt ein münch oder zwen

Keyn hun / Cappun / kein gütter fisch

Keyn prater haß der in entwisch

Die sich gar hübschlich schieben drein

Damit kein praß noch gutter wein

In gantzer statt in werd verraten

Sy müssen im ein kappen schrotten

Und wo sy gand sauffen sich voll

Ja glüen wie ein glumend kol

Da von sy faist und lestig sein

Außgemeßt recht wie die becker schwein

Sölten auch teglich geben brot

Daß man den armen helff auß not

Auch speiß die uberblieben wer

So kommens mit eym geschlepper her

Ich glaub daß nur spülwasser sey

Sy geben weder kraut noch brey

Ja kochen nit eins quintlins mee

Damit nit grosser kost auffgee

Auff daß werd gemert ir gut und gelt

In gleyßnerey betriegen die welt

Seind reissendt wolff in schaffes schein

Füren die welt in helsche pein

Darumb ich Lucifer frey sag

Es ist kein volck auff disen tag

Durch welchs mein Reich mer gefüllet wirt

Darumb uns dan[n] herwider gbürt

In geben hie gwalt / eer / und gut

Und ewig lon in helscher glut

1523