10. Oktober

   C. vj. Idus. Octobris.

   Zů Kolne sanctorum Gereonis mit drin hundirt und achzen mertirerin .

   Die warin von sente Mauritius schar. Die wurdin enthoubit durch got.

   Tzů Troia sanctorum Victoris mit drin hundirt mertirerin und drizig .

   Zů Verona sanctorum Cassij , Florentij mit andirin siebinin .

   Und sancti Paulini , der was bischof. Der bekate vil volkis.

   Und Iob , der ein propheta was.

   Bildbeschreibung:

   Die Enthauptung des heiligen Gereon und weiterer dreihundertundachtzehn

   Märtyrern.

   11. Oktober

   D. v. Idus. Octobris.

   Zů Tharsium sanctorum Tharatij , Probi und Androniti . Die wurdin vil

   pinlich gemartiret. Sie wurdin lange in deme kerkere gepiniget, dar na

   mit ron senen geslagin, dar na mit scharfin schermezzirin zů rizzin,

   dar na ůmme den buch und ůmme die sitin gebrant und die wangin zů

   rizzin, dar na seniph und ezzich in die nasin gegozzin und die ougin

   und die vingere mit negilin zů stochin, und die zungin ab snidin. Dar

   na in eine grubin von lewin und berin geworfin. Und do in daz alliz

   nicht geschadin mochte zů lestin wurdin sie enthoubit. Und do namin sie

   ire lichamin und wurfin sie undir die mordire, die da ouch vorterbit

   warin, daz die kyrstin ire licham nicht mochtin erkennin. Also gab in

   got des nachtis, do sie quamin, daz ire lichamin sůndirlich schienin

   als die sterne. Also namin si sie und bestattin sie mit grozin erin.

   Zů Sicilia sanctorum Anastasij , der was priestir, und Placidi und

   Martialis .

   Und ouch sanctorum Iusti , Arthemij und Honeste , die was maget. Und

   wurdin gemartiret alle durch gotis liebe.